Miranda anuncia a posta en marcha da “Aula GaliciaAberta” para manter a formación e divulgación da cultura galega en todo o mundo durante a crise do coronavirus
O secretario xeral da Emigración adiantou que a proposta permitirá aos galegos e galegas, tanto do exterior como da comunidade, gozar de obradoiros en liña de distintas disciplinas relacionadas co patrimonio inmaterial de Galicia.
Os seminarios darán comezo o luns 27 de abril, e serán gratuítos e de libre acceso para todos os públicos.
O secretario xeral da Emigración, Antonio Rodríguez Miranda, anunciou hoxe o novo proxecto no que está a traballar o departamento autonómico, e que se atopa xa na súa última fase preparatoria. A Aula GaliciaAberta busca manter a actividade formativa e divulgativa da cultura galega en todo o mundo, alomenos durante o tempo que se prolongue a actual crise do coronavirus. Con esta medida o Goberno galego pretende paliar parte das consecuencias dunha pandemia que está a paralizar a actividade de gran parte das entidades galegas no exterior, que se viron forzadas nas últimas semanas a pechar as súas sedes e cancelar a inmensa maioría dos seus compromisos sociais e culturais.
A “Aula GaliciaAberta” quere dar, así, cobertura aos socios e socias dos centros galegos que atopan máis dificultades á hora de manter activas as súas actividades lectivas, ou complementar, noutros casos, as que si se seguen a impartir a través de Internet. “Desde a Xunta de Galicia sabemos que as entidades galegas no exterior son fundamentais tanto para preservar e difundir a cultura e tradicións de Galicia no exterior, como para estreitar os lazos entre os galegos que viven fóra das nosas fronteiras e os que residen na propia comunidade”, sinalou Miranda. “Hoxe, esa función faise aínda máis visible e necesaria”, engadiu, “porque as barreiras agora están levantadas para todos, e están a separar familias que viven a poucos metros de distancia, ou incluso na mesma casa. Nós, con esta nova iniciativa, queremos poñer o noso grao de area para derrubar esas barreiras e acurtar as distancias, que xa non entenden de fronteiras nin de continentes”.
Retransmisión en directo
De aí que os obradoiros en liña que comezarán o luns 27 de abril, vaian ter carácter gratuíto e público, xa que estarán dirixidos non só os alumnos e alumnas xa existentes de calquera das materias, senón tamén a aquelas persoas que, malia non ter coñecementos previos, queiran achegarse a estas disciplinas. Baile tradicional galego, canto e pandeireta, percusión e gaita tradicional galega centrarán esta edición inaugural da “Aula GaliciaAberta”. A retransmisión en directo destas clases poderá seguirse a través das redes sociais da páxina web da Secretaría Xeral da Emigración, GaliciaAberta - emigracion.xunta.gal, onde se irá ampliando a información relativa a este novo programa do departamento autonómico nos vindeiros días.
Este novo programa complementa o dos obradoiros tradicionais, que permitían a centros galegos de todo o mundo contar coa presenza dun profesor ou profesora, desprazado desde Galicia, de algunha das disciplinas incluídas na convocatoria que durante varias semanas reforzaba as actividades lectivas que levan a cabo nas súas sedes. A actual situación, tanto en España, que continúa en Estado de alarma, como noutros países, fai, sen embargo, inviable as actividades lectivas presenciais nos centros galegos de todo o mundo, polo que a Secretaría Xeral da Emigración continúa a buscar medidas como esta que aminoren parte das consecuencias que esta pandemia está a deixar nos principais países con maior poboación galega.
Novas relacionadas