O secretario xeral da Emigración, Antonio Rodríguez Miranda, reuniuse cos cónsules honorarios de tres das rexións con maior presenza galega de Venezuela. A e os representantes de Valencia, Roberto Freire; Anzoátegui, Richard Barreiro; e Barquisimeto, Daría González, trasladaron ao responsable do departamento autonómico galego a situación que atravesa o país, que é cada día máis preocupante e que afecta á poboación galega que reside no país suramericano coa mesma intensidade que ao resto das e dos habitantes de Venezuela.

Miranda transmitiu o total apoio que ofrece o Goberno galego a todas e todos os galegos e venezolanos que viven no país, e os desexos de que a gravísima situación na que está inmersa desde hai tempo se resolva do xeito máis beneficioso posible para todos os cidadáns e as cidadás. O secretario xeral da Emigración puxo novamente os recursos de que está dotado o departamento autonómico a disposición de todos aqueles galegos e galegas que poidan acollerse a algún dos programas ou axudas deseñados pola Xunta de Galicia para contribuír a mellorar a súa calidade de vida e garantir as súas necesidades básicas.