A Secretaría Xeral da Emigración felicitou os centros galegos de Madrid pola súa defensa da lingua da nosa comunidade na celebración do Día das Letras Galegas na capital de España
O director da Casa de Galicia na capital, José Ramón Ónega López, e o representante do departamento autonómico no evento, o subdirector xeral da Emigración e das Comunidades Galegas, Antonio Casas Calviño, asistiron ao acto organizado pola Federación de Asociacións Galegas en Madrid (Fagama).
A Secretaría Xeral da Emigración felicitou esta mañá os centros e asociacións galegas con sede na capital de España pola defensa e a firme aposta que fan desde hai décadas pola preservación e difusión da nosa lingua durante un acto organizado pola Federación de Asociacións Galegas en Madrid (Fagama), que tivo lugar na Casa de Galicia madrileña, e á que asistiron o director de esta entidade, José Ramón Ónega López, e o subdirector xeral da Emigración e das Comunidades Galegas, Antonio Casas Calviño, quen quixo agradecer o seu labor ás e aos asistentes a esta celebración do Día das Letras Galegas.
Casas Calviño aproveitou a ocasión para lembrar que o autor homenaxeado este ano, Antón Fraguas, estivo a piques de converterse tamén nun emigrante, neste caso do Brasil, onde os seus pais planeaban mudarse. “O seu talento e a promesa dun futuro prometedor en Galicia impediron que finalmente marchara coa súa familia a Nitteroi, lugar no que o seu proxenitor xa vivira e traballara varios anos antes de regresar ao seu Cotobade natal. Pero a lección quedou no pequeno Antón, e el devolveuna décadas máis tarde en forma de frase que pasou á historia, de onde non se vai mover: 'Ser galeguista non é máis que ser amante da nosa terra'. Nin ser galeguista nin ser galego depende en absoluto de ideoloxías, formas de ser ou nacionalidades. María Victoria Moreno, a quen se lle dedicou o recoñecemento en 2018, aportou á nosa terra tanto como Castelao aportou á Arxentina ou Antón Fraguas puido ter aportado ao Brasil, e como tantos intelectuais deron a Madrid”.
O delegado da Xunta na capital española e director da entidade, pola súa banda, destacou a fidelidade que Fagama profesa á celebración das Letras Galegas, que conmemora puntualmente cada ano sumándose á difusión da figura homenaxeada e, ao tempo, fortalecendo a unión das entidades galegas en Madrid. Este ano, ademais, Ónega entregou catro Diplomas de recoñecemento de méritos por parte da Casa de Galicia a outros tantos membros da Federación: Fernando Gómez Rodríguez, vicepresidente da Xuntanza de Galegos en Alcobendas e secretario de Fagama; e José Díaz Muiña, José Carracedo Pousada e Teodoro Basanta Cabanas, directivos da Xuntanza de Galegos en Alcobendas. No acto tamén interveu o presidente de Fagama, Ovidio Cadenas.
Conferencias e música para honrar o antropólogo
O programa de actividades incluíu a conferencia sobre a figura do antropólogo e escritor de Cotobade que impartiu o biógrafo e membro da Fundación Antonio Fraguas Fraguas, Clodio González, e a actuación que ofreceu o cantautor ourensán Emilio Rúa, e rematou cun xantar no restaurante Real Hípica de Griñón.
Na Comunidad de Madrid residen actualmente 78.201 galegas e galegos, dos que 26.841 proceden da provincia da Coruña, 15.527 da de Lugo, 15.501 da de Ourense e 20.332 da de Pontevedra. Pola contra, Galicia acubilla 23.293 residentes madrileñas e madrileños, dos que 10.410 fano na provincia da Coruña, 2.920 na de Lugo, 2.209 na de Ourense e 7.754 na de Pontevedra. Estas cifras, publicadas polo Instituto Nacional de Estadística (INE) a data 1 de xaneiro de 2019, poñen de relevo a imprescindible e estreita relación que manteñen historicamente ambas comunidades autónomas.
Novas relacionadas