O secretario xeral da Emigración, Antonio Rodríguez Miranda, invitou esta mañá a todas as entidades galegas de Europa a “intensificar a súa actividade e seguir a incrementar a súa relevancia nos seus países de residencia para fortalecerse e non deixar de medrar”. “Os retos son cada día maiores, por iso a implicación ten que ser tamén máis forte, para que todos os galegos do exterior sintan cada centro galego como propio, e a cultura galega, a súa”, engadiu. O responsable do departamento galego fixo este chamamento durante a celebración dos 40 anos do Centro Galego de Marsella, fundado no ano 1978 e presidido na actualidade por Manuel Silva Pereira.

O programa de actos, que contou coa participación do cónsul general de España na cidade francesa, Alberto Moreno Humet, e coa chanceler, María Luisa López Mercader, contou, ademais de coas intervencións das e dos invitados, entre quen tamén se atopaba a presidenta do Centro Español de Marignane, Michelle Brun, coa actuación do grupo folclórico Fentos e Toxos, pertencente á entidade marsellesa.

Reunir  ás e aos emigrantes de orixe galega
O Centro Galego de Marsella é unha das cinco entidades galegas espalladas polo mundo, xunto á Sociedad Cultural Recreativa Carballeira de Zarautz, Casa Cultural de Galiza de Elgoibar, o Centro Galego Nós Sabadell e o Centro Gallego de Málaga, que veñen de cumprir 40 anos. O marsellés constituíuse co obxectivo de “reunir aos emigrantes de orixe galega e todas as persoas que simpaticen cos costumes de Galicia, co fin de manter a cultura e tradicións da rexión”.

Conta na actualidade con preto de 200 socias e socios, dos que máis da metade son galegos, e conta co grupo de bailes e gaitas Fentos e Toxos, que participa en numerosos festivais e citas musicais.