Miranda reúnese coa embaixadora de Australia en España, Julie-Ann Guivarra, para tratar os retos que afrontan ambas rexións
O secretario xeral da Emigración, Antonio Rodríguez Miranda, acompañado polo delegado da Xunta na Coruña, Ovidio Rodeiro Tato, mantivo unha reunión coa embaixadora de Australia en España, Julie-Ann Guivarra, e coa segunda secretaria de Asuntos Políticos e Culturais, Ana Becerra Riveroll, como primeiro contacto entre ambas institucións. Entre outras cuestións, as e os representantes de ambos organismos trataron os retos que afrontan as súas respectivas rexións, entre os que destacan as políticas do exterior e o reto demográfico. Neste sentido, Miranda expuxo ás representantes australianas tanto as medidas de conservación de lazos coa terra de orixe como as de fomento de retorno, dirixidas ambas ás e aos cidadáns que residen no exterior, que o Goberno galego leva a cabo, e no que as autoridades do país de Oceanía amosaron moito interese.
En Australia residen un total de 1.908 cidadás e cidadáns galegos, dos que 784 son orixinarios da provincia da Coruña, 214 da de Lugo, 406 da de Ourense e 504 da de Pontevedra, segundo os datos publicados polo Instituto Nacional de Estadística (INE) a data 1 de xaneiro de 2019. Delas e eles, pouco máis da metade, 1.068, foron nados en Galicia e o resto, xa no seu país de destino.
Novas relacionadas