Miranda reúnese con responsables do Goberno cubano e español para intensificar a coordinación na tramitación dos programas de axuda do Goberno galego
O secretario xeral da Emigración foi recibido por representantes do Ministerio de Exteriores de Cuba e a Consejería Laboral da Embaixada para continuar avanzando en cuestións de cooperación institucional.
O titular do departamento autonómico mantivo un encontro co presidente da Federación de Sociedades Gallegas de Cuba, Sergio Toledo, entidade que colabora na entrega das axudas aos galegos e galegas de La Habana.
O secretario xeral da Emigración, Antonio Rodríguez Miranda, mantivo sendas reunións con diversos representantes do Ministerio de Exteriores (Minrex) de Cuba e da Embaixada de España co obxectivo de seguir avanzando nas cuestións de cooperación internacional que competen ao Goberno galego. O titular do departamento autonómico foi recibido pola máxima responsable da Dirección de Europa y Canadá, Alba Soto Pimentel, quen vén de tomar posesión do seu cargo recentemente e con quen tratou das estreitas relacións entre os dous gobernos e dos programas que o Executivo galego mantén activos desde hai décadas para axudar a garantir as necesidades básicas das cidadás e os cidadáns galegos residentes na illa.
Tanto a xuntanza coa representante do Goberno cubano, que se desenvolveu coa presencia do embaixador de España en Cuba, Jesús Fernández Trigo, como a celebrada co xefe da Oficina de Consejería de Empleo y Seguridad Social da Embaixada de España, Jesús Chacón García, enmárcanse dentro das relacións institucionais de estreita colaboración que manteñen as tres Administracións gobernamentais, que perseguen facilitar a xestión dos programas da Xunta de Galicia para as e os residentes no país centroamericano.
Oficina no antigo pazo do Centro Gallego
Tamén con este obxectivo o secretario xeral da Emigración presidiu un encontro co presidente da Federación de Sociedades Gallegas de Cuba, Sergio Toledo, entidade responsable da oficina de atención aos galegos e galegas, situada en La Habana. É nestas instalacións, ubicadas no antigo pazo do Centro Gallego, hoxe sede do Gran Teatro de La Habana, onde se tramitan gran parte das solicitudes de axuda formuladas polas e polos galegos sen recursos que viven na capital cubana.
Novas relacionadas