A Casa de Galicia de Córdoba, exemplo de integración e achega cultural na sociedade de recepción, presentou a Miranda o seu balance de actividades
O secretario xeral da Emigración comprometeu o apoio do seu departamento á continuidade do Premio Literario ‘Rosalía de Castro’, unha das actividades do centro con maior transcendencia social en toda Andalucía.
O secretario xeral da Emigración, Antonio Rodríguez Miranda, recibiu no seu despacho en Santiago á directiva da Galicia de Córdoba, Maribel García Cano, quen expuxo a actividade desenvolvida pola súa entidade nos últimos meses, nos que ten consolidado e reforzado a presenza da comunidade galega na cidade.
Miranda comprometeu o apoio do seu departamento para a continuidade do premio literario Rosalía de Castro, que organiza o Centro Galego de Córdoba, e que ten acadado unha importante sona dentro e fóra da cidade polo importante número de obras, e a calidade das mesmas, que se presentan cada ano.
“Córdoba é un expoñente exemplar do mantemento das ligazóns entre os galegos da diáspora, e entre as segundas xeracións e a terra dos seus pais, e tamén un baluarte de traballo por parte dos galegos e galegas que alí nos representan. Ademais, o Premio Rosalía de Castro é un símbolo de como a Galeguidade se insire e engrandece a cultura local”, en palabras do secretario xeral da Emigración.
Con 30 anos de historia, a Casa de Galicia en Córdoba mantén unha frutífera colaboración coas administracións locais para a realización de actividades culturais. É un dos centros máis activos neste eido, xa que, ademais das constantes e permanentes actividades, convoca diversos premios que teñen adquirido un gran prestixio na sociedade andaluza.
Novas relacionadas