Emigración participa en Lalín na entrega dos premios Alecrín 2021
O acto deste ano ten como obxectivo promocionar a capital do Deza e a súa famosa gastronomía entre as directivas dos centros galegos asentados en Cataluña.
Entre os premiados e premiadas atópanse Antonio Díaz, do xornal Crónicas da Emigración, e Pablo Rodríguez, fotógrafo e organizador de exposicións, pola súa labor a prol da emigración.
O subdirector da Secretaría Xeral da Emigración, Antonio Casas, participou hoxe no acto de entrega dos premios Alecrín 2021, que organiza a Federación de entidades culturais galegas de Catalunya (Fegalcat) e que se desenvolveu no Auditorio municipal de Lalín.
No acto estiveron presentes o presidente do Parlamento de Galicia, Miguel Ángel Santalices, o secretario xeral de Política Lingüística, Valentín García Gómez, o presidente da Deputación de Ourense, José Manuel Baltar, así como o propio alcalde de Lalín, José Crespo.
O representante da Secretaría Xeral da Emigración fixo entrega do premio Alecrín no eido de escritor local a Xoán Carlos García Porral.
Tamén recibiron esta homenaxe o xornalista Antonio Díaz, do xornal Crónicas da Emigración; a Central Heladera, pola defensa do selo de Galicia Calidade; a artista Pili Pampín polos seus máis de 30 anos de traxectoria profesional; a catedrática de Comunicación Audiovisual Margarita Ledo; o blogueiro Alberto Rivas; o avogado berciano Luis Cuervo; o grupo Carballo da Manteiga de Lalín; o pintor Manuel Quintana; o libreiro Pablo Rodríguez; o piloto de trial Jordi Tarrés; e o xornalista Siro López.
Durante o evento tamén se lle fixo entrega a Manoel Carrete do seu nomeamento como secretario de honra da Fegalcat.
O evento permitiu non só destacar a todas e todos os premiados polo seu labor en prol da emigración, do galego e da galeguidade, senón tamén reunir ás e aos directivos dos diferentes centros galegos en Cataluña e promocionar a cultura e a gastronomía do Deza entre a comunidade galega que reside nesa comunidade autónoma.
Novas relacionadas