O secretario xeral da Emigración, Antonio Rodríguez Miranda, inicia hoxe unha intensa viaxe por Cuba que o levará a visitar durante a vindeira semana diferentes puntos da xeografía do país para reunirse con representantes tanto diplomáticos como das agrupacións de galegas e galegos residentes na illa para interesarse polo estado da xestión das axudas e as e os seus destinatarios.

O programa de traballo do responsable do departamento autonómico comezará mañá á mañá coa xuntanza que manterá co embaixador de España na república cubana, Juan José Buitrago, con quen xa mantivo un primeiro encontro na viaxe que realizara á illa o pasado mes de abril. A continuación, ambos participarán nunha reunión con responsables cubanos de Relacións Exteriores en Europa e o de Xustiza. En ambos encontros os representantes institucionais de sendos países aproveitarán para fortalecer as relacións que o Goberno de Galicia mantén co cubano e para ofrecer unha actualización da colaboración entre ambas Administracións.  

Encontro coas sociedades galegas
Rodríguez Miranda participará a continuación no capítulo extraordinario organizado pola Enxebre Orde da Vieira con motivo do 110 aniversario do himno galego, que terá lugar no antigo palacio do Centro Gallego e actual Gran Teatro de de La Habana, e no que se renderá unha homenaxe a José Castro, “Chané”, no centenario do seu pasamento.

O secretario xeral da Emigración continuará o seu percorrido en Santiago de Cuba e Pinar del Río. E reservará o último día da súa viaxe para reunirse, xunto ao embaixador español en Cuba, coas e cos diferentes presidentes das sociedades galegas na illa centroamericana e co máximo responsable da Federación de Sociedades Gallegas en la República de Cuba, Sergio Toledo.

Máis de 7.000 familias con axudas individuais
A Secretaría Xeral da Emigración leva anos especialmente preocupada pola situación dos galegos e as galegas residentes na illa centroamericana. O benestar das e dos emigrantes e as súas familias en Cuba leva sendo unha prioridade para a Xunta de Galicia dende hai varias lexislaturas, e precisamente para garantir as súas necesidades máis básicas o departamento autonómico que dirixe Rodríguez Miranda vén de destinar preto de 1,4 millóns a axudas individuais, que chegaron a 7.012 familias. Cóbrense así as necesidades máis urxentes da meirande parte da poboación galega na illa, formada por máis de 40.000 persoas.