A Comisión Delegada do Consello de Comunidades Galegas reunirase en Celanova o vindeiro mes de decembro por vez primeira desde a súa renovación

O órgano foi renovado no último pleno do Consello de Comunidades Galegas, celebrado en maio de 2016 en La Habana, Cuba.

Listen to this page using ReadSpeaker
Santiago de Compostela, 10 de novembro de 2017.

Os vindeiros 12 e 13 de decembro terá lugar en Celanova a xuntanza ordinaria da Comisión Delegada do Consello de Comunidades Galegas, máximo órgano de representación e reflexión entre plenarios do Consello.

Entre os asuntos que se contemplan na orde do día da reunión sinálanse a exposición das liñas de actuación da Secretaría Xeral da Emigración no ano 2017; a presentación do borrador do Plan integral da emigración 2017-2020; a presentación das liñas de actuación en materia de emigración para o 2018; e un informe das atribucións que o Decreto 111/2015, de 6 de agosto, lle atribúe á Comisión Delegada.

Composición da Comisión
Forman parte da Comisión Delegada do Consello das Comunidades Galegas catorce integrantes en representación de cadansúa entidade, auténtica depositaria da representación. Destes e destas 14 membros, doce son electos (catro en representación da diáspora en España, catro da de Europa, e catro da de América) e dous natos.

Tralo plenario do Consello celebrado en maio de 2016 en La Habana (Cuba), representan á demarcación española o Centro Gallego de Salamanca, a Unión de Sociedades Galegas de Cataluña (UAGALCAT), o Lar Gallego de Sevilla e a Agrupación Hijos de Galicia en Sestao. A europea estará integrada polo Centro Cultural Gallego de Cuxhaven de Alemaña, a Asociación Cultural “As Xeitosiñas” de Zürich de Suiza, o Centro Gallego de Londres e a Xuventude de Galicia-Centro Galego de Lisboa.

Pola parte da diáspora en América, represéntaa a Sociedad Cultural Rosalía de Castro de Cuba, a Asociación Civil Hijos del Ayuntamiento de Zas de Bos Aires, a Unidad Gallega de los Estados Unidos de Nova Yorke e o Centro Pontevedrés Social y Deportivo de Montevideo. Son membros natos da Comisión a Casa Galicia de Montevideo e a Hermandad Gallega de Venezuela en Caracas.

1139 lecturas