A Xunta apoia a mobilidade internacional dos investigadores e investigadoras galegos

As axudas están dispoñibles para calquera investigador ou investigadora galegos contratados nun centro alleo ao Sistema Universitario de Galicia, no marco do Programa Ángeles Alvariño.

As bolsas da Consellería de Economía e Industria están orientadas a incrementar a presenza galega no Espazo Europeo de Investigación e atraer talento de referencia internacional.

Os investigadores e investigadoras, ademais de ter a posibilidade de realizar as súas estadías en España, poderán escoller outros países de destino en Europa, África ou Iberoamérica, así como en Estados Unidos, Canadá ou países de Asia e Oceanía.

A bolsa cubre unha primeira axuda para os gastos de desprazamento e seguros e unha asignación mensual.

Listen to this page using ReadSpeaker

A Consellería de Economía e Industria, ao abeiro do Plan Galego de Investigación, Innovación e Crecemento (I2C) 2011-2015, apoia a mobilidade internacional dos investigadores e investigadoras galegos. Deste xeito, a Consellería que dirixe Javier Guerra vén de facer pública a convocatoria das axudas para estadías no estranxeiro de científicos de centros de investigación galegos non universitarios.

O Goberno galego traballa para internacionalizar a investigación en tódolos eidos do Sistema Galego de Innovación coma no ámbito doutros Sistemas de I+D+i, especialmente para incrementar a presenza galega no Espazo Europeo de Investigación e para atraer talento de referencia internacional, tendo en conta que a mobilidade dos investigadores e investigadoras é fundamental para acadar os niveis de excelencia axeitados, de cara a facer competitiva á Comunidade Autónoma.

Estas bolsas teñen como finalidade favorecer a actualización de coñecementos e a adquisición de novas técnicas de investigación, así como completar a formación dos investigadores e investigadoras de Galicia, mediante a súa incorporación temporal a centros do exterior, preferentemente do estranxeiro.

As bolsas irán destinadas a cubrir unha primeira axuda para os gastos de desprazamento e seguros e unha asignación mensual bruta, que pode chegar ata 1.900 euros. Deste xeito, os investigadores e investigadoras, ademais de ter a posibilidade de realizar as súas estadías en España, poderán escoller outros países de destino en Europa, África ou Iberoamérica, así como en Estados Unidos, Canadá ou países de Asia e Oceanía.

As condicións de acceso a estas bolsas, dirixidas a investigadores e investigadoras contratados ao abeiro do Programa Ángeles Alvariño, mediante o que se lle dá soporte á incorporación laboral dos recén doutorados e doutoradas, aparece recollida hoxe no Diario Oficial de Galicia (DOG), cun prazo de solicitude que se manterá aberto ao longo do mes de setembro.

As axudas poderán ser solicitadas polo persoal investigador que dispoña de contrato vixente Ángeles Alvariño nun dos trece centros de investigación galegos alleos ao Sistema Universitario de Galicia (SUG), sempre que aínda non completasen 24 meses de estadías noutros centros alleos e que non acadasen o grao de doutor ou doutora nunha universidade estranxeira.

992 lecturas