Máis de 50.000 alumnas e alumnos téñense beneficiado dos obradoiros e seminarios convocados por Emigración, cuxa edición de 2016 publica hoxe o DOG
Impartiranse nas comunidades galegas do Exterior durante este ano, coa axuda da Xunta, accións formativas en baile, gaita, percusión, pandeireta e canto, cultura galega, cociña galega, e artesanía (encaixe de palillos e confección de traxe tradicional.
O prazo de presentación de solicitudes esténdese por un mes.
O Diario Oficial de Galicia publica hoxe a resolución da Secretaría Xeral da Emigración pola que se establecen as bases reguladoras para o desenvolvemento de obradoiros de folclore, artesanía, cociña e seminarios de cultura galega en colaboración coas entidades galegas do Exterior.
Concretamente e na edición deste ano, os obradoiros convócanse para as especialidades de baile, gaita, percusión, pandeireta e canto, artesanía (encaixe de palillos e confección de traxe tradicional), cociña galega, e seminarios de cultura galega. No caso destes últimos, consolídanse na convocatoria debido á súa demanda por parte dos propios centros e comunidades galegas do Exterior, despois de térense estreado con óptimo aproveitamento en pasadas edicións.
A formación desenvolverase ao longo de 15 días, cun tempo docente total de 40 horas, agás no caso dos obradoiros de cociña e seminarios de cultura, cuxa duración e tempo lectivo redúcese á metade.
Emigración destina neste ano orzamentario para esta iniciativa 90.000 euros, cos que sufraga a remuneración da persoa docente, o co custo do desprazamento do formador ou formadora ao lugar de realización do curso, o custo do material necesario para impartir os obradoiros de carácter artesanal, de cociña, seminarios de cultura galega e, se é o caso, do seu envío, e o custo de elaboración dos contidos dos obradoiros e o seu desenvolvemento.
Obrigas das comunidades
Pola súa banda, as entidades galegas fanse cargo dos gastos de estadía e manutención da persoa formadora en lugar e condicións axeitadas, dos gastos de traslado do formador ou formadora dentro da cidade onde teña lugar o curso, da xestión e dotación das instalacións axeitadas, e da subministración doutro material funxible necesario.
Na convocatoria, que fixa nun mes o prazo de presentación das solicitudes, estipúlanse asemade a documentación necesaria e o procedemento e criterios de valoración para a adxudicación dos cursos, así como os sistemas de seguimento e control. A publicación no DOG consolídase nas primeiras semanas do ano, co obxectivo de que as persoas que viaxen ao abeiro do programa teñan tempo abondo para planificaren os seus desprazamentos ata e en Galicia.
É de salientar que o alumnado destes obradoiros, grazas á instrución e mellora das súas habilidades, acrecentan o seu interese e vinculación con Galicia. Así, e segundo o secretario xeral da Emigración Antonio Rodríguez Miranda, “a formación espállase a decenas de milleiros de alumnas e alumnos polos centros e casas de Galicia no mundo, pero sobre todo fornécese a ligazón entre a Galicia territorial e os seus fillos espallados por todo o mundo”.
Ata o momento, téñense formado directamente nas distintas edicións dos obradoiros e seminarios convocados por Emigración desde hai máis de 20 anos, máis de 50.000 alumnas e alumnos.
Novas relacionadas