Feijóo recibe ao presidente da Hermandad Gallega de Venezuela e transmítelle a cercanía e a solidariedade de Galicia aos 46.000 galegos e galegas que viven nese país

A Xunta está a destinar uns 600.000 euros anuais para atención social, sanitaria, e cultural aos galegos e galegas de Venezuela.

O Goberno autonómico axuda a familias en situación de precariedade, a dependentes e a persoas enfermas graves ou permanentes a comprar medicamentos e a paliar situacións de exclusión.

Feijóo, González e Miranda durante a xuntanza que tivo lugar hoxe en Santiago de Compostela
Feijóo, González e Miranda durante a xuntanza que tivo lugar hoxe en Santiago de Compostela
Listen to this page using ReadSpeaker
Santiago de Compostela, 26 de maio de 2015.

O presidente da Xunta de Galicia, Alberto Núñez Feijóo, recibiu ao novo presidente electo da Hermandad Gallega de Venezuela en Caracas,  Roberto González Pérez, nunha xuntanza na que tamén estivo presente o secretario xeral da Emigración, Antonio Rodríguez Miranda. Feijóo transmitiu a González o calor e solidariedade de todo o pobo galego coa poboación venezolana, e moi especialmente coa de orixe na nosa Comunidade, nos actuais momentos de incerteza que atravesa o país.

Lembrou, así mesmo, o esforzo que a Xunta está a realizar por que esa solidariedade se traduza en liñas de apoio e axudas ás comunidades e individuos que máis o necesitan, de maneira que o acento social da liña de actuación do Goberno galego se transmita de igual maneira á Galicia do exterior. A Xunta destina uns 600.000 euros anuais para atención social, sanitaria e cultural aos galegos e galegas de Venezuela.

Froito da colaboración coas entidades galegas en Venezuela, das que a ‘Hermandad’ caraqueña é con diferenza a máis relevante, Emigración axuda a familias en situación de precariedade, a dependentes e  persoas enfermas graves ou permanentes, a adquirir medicamentos e tratamentos de enfermidades crónicas ou graves, a galegas que sofren violencia de xénero, e a paliar situacións de exclusión social por desemprego, entre outros aspectos.

Finalmente, o presidente asegurou que, como piar fundamental da galeguidade en Venezuela e en todo o mundo, seguirá recibindo o firme apoio das institucións galegas para que o seu labor social, e a cultura e idiosincrasia galegas, permanezan vivas e fortes na sociedade de recepción. Actualmente, en Venezuela residen uns 46.000 cidadáns e cidadás galegos.

698 lecturas