Aberto o prazo de solicitudes para a inscrición en ‘Escolas Abertas’, o programa de Emigración que espalla Galicia por todo o mundo

Milleiros de galegas e galegos no mundo benefícianse, a través das e dos 800 alumnos que teñen pasado polas distintas edicións do programa, da actualización de coñecementos e experiencias en distintas disciplinas relacionadas coa cultura galega.

Noventa cidadás e cidadáns residentes no exterior accederán a formación especializada en gaita, baile, percusión, canto e confección, para despois divulgala nos seus países de residencia.

Imaxe de arquivo do acto de clausura en Lugo da edición de 2015 das Escolas Abertas presenciais
Imaxe de arquivo do acto de clausura en Lugo da edición de 2015 das Escolas Abertas presenciais
Listen to this page using ReadSpeaker
Santiago de Compostela, 12 de febreiro de 2016.

O Diario Oficial de Galicia publica hoxe a resolución da Secretaría Xeral da Emigración pola que se regula e convoca o programa de Escolas Abertas presenciais destinadas ás comunidades galegas e persoas, galegas e residentes fóra da Galicia territorial, para o ano 2016.

O prazo de presentación de solicitudes é dun mes, polo que remata o 12 de marzo. Nesta edición de 2016, consolídase a cifra de prazas ofertadas, que vén sendo a habitual en anos anteriores, noventa en total. Delas, está previsto que 21 se acheguen desde países europeos, e as e os 69 restantes desde outros do resto do mundo.

Trátase dun programa que pretende espallar a cultura, modo de vida e actualidade de Galicia por todo o mundo a través da convivencia e estadía de persoas que transmitirán a súa experiencia propia a moitas e moitos outros nos seus lugares de orixe ou residencia habitual, mediante o efecto multiplicador dos cursos formativos. Desta maneira, a Galicia actual dáse a coñecer da maneira máis efectiva e afectiva.


Formación de formadores/as
As e os alumnos deste programa son, á súa vez, formadores e formadoras nos lugares dos que proceden, polo que os seus coñecementos, e tamén a súa experiencia de contacto directo coa realidade actual do país, chega así á cidadanía da Galicia do Exterior. Coa instrución e mellora de habilidades das e dos participantes na iniciativa, acrecéntase o interese e a formación de milleiros de galegas e galegos residentes, e mesmo nados, fóra da Galicia territorial.

Así, e segundo o secretario xeral da Emigración Antonio Rodríguez Miranda, “unha das chaves fundamentais para manter a ligazón e compromiso entre Galicia e os seus emigrantes, e sobre todo cos descendentes destes, é a formación en materias fortemente relacionadas coa nosa maneira de ser, coa nosa maneira de vivir. A formación, a través dos participantes en Escolas Abertas, fornece, espalla e fortalece a nosa cultura a decenas de milleiros de alumnas e alumnos por tódalas comunidades galegas do planeta”.

Ata o momento, téñense formado directamente nas distintas edicións do programa en torno a 800 persoas, pero cada unha delas transmite despois os seus coñecementos e aprendizaxe aos respectivos alumnados nos centros e casas de Galicia onde imparten as clases.

Modalidades
Os cursos que se levan a cabo nesta edición de 2016 consisten en obradoiros de especialización das seguintes modalidades: gaita tradicional galega, baile tradicional galego, percusión tradicional galega, canto popular e pandeireta, e confección de traxe tradicional galego. Cómpre salientar que sempre se trata de obradoiros que teñen unha ampla demanda nas entidades galegas no exterior, criterio básico seguido por Emigración para a convocatoria destes cursos.

1399 lecturas