196 mozas e mozos galegos do exterior convivirán con residentes na terra mercé ao programa ‘Conecta con Galicia’ de Emigración e Xuventude

Mercé ao elevado uso das redes sociais entre a xuventude, as vivencias en primeira persoa das e dos participantes espállanse en tempo real entre a mocidade dos países nos que se asentan as comunidades galegas.

Desta maneira, tanto aquelas e aqueles que participan directamente como a súa familia e contorna, actúan de altofalantes da Galicia actual e moderna.

A iniciativa conta con dúas modalidades, unha de actividades ao aire libre e outra en campos de traballo.

Imaxe de arquivo da visita do secretario xeral da Emigración ás e aos mozos do campo de traballo de Portomarín (Lugo)
Imaxe de arquivo da visita do secretario xeral da Emigración ás e aos mozos do campo de traballo de Portomarín (Lugo)
Santiago de Compostela, 30 de marzo de 2017.
Listen to this page using ReadSpeaker

O Diario Oficial de Galicia publica na súa edición de hoxe a resolución pola que se regula e convoca o programa de axudas para a participación no programa “Conecta con Galicia” dirixido a mozos e mozas de orixe galega ou descendentes de persoas galegas e que residan no exterior, durante o ano 2017.

Trátase dunha iniciativa da Secretaría Xeral da Emigración en colaboración coa Dirección Xeral de Xuventude, Participación e Voluntariado, da Consellería de Política Social, pola que se pretende que este colectivo teña oportunidade de coñecer de primeira man a realidade galega, e atoparse coas súas familias da outra beira do Atlántico.

O programa ten como obxectivo fortalecer esas ligazóns que relacionan a estes mozas e mozos coa terra das e dos seus familiares e que, en moitas ocasións, senten como propia ao mesmo ou superior nivel dos países onde naceran. A iniciativa, para moitos deles e delas, supón a primeira posibilidade de coñecer fisicamente a terra dos seus devanceiros e devanceiras, e as xeracións da familia que quedaron na Galicia territorial. Trátase, en definitiva, de fortalecer eses vínculos como base sólida para un ulterior retorno definitivo destes galegos e galegas do Exterior á terra da orixe familiar.

Así, o programa permitirá que case douscentos (196) descendentes de galegos e galegas poidan coñecer a realidade da mocidade galega a través da convivencia e das experiencias que lles acheguen as actividades previstas, e sobre todo da convivencia persoal e humana coas e cos seus coetáneos desta parte do océano, pois a estadía realízase conxuntamente cun colectivo de rapaces e rapazas residentes na Galicia territorial.

Actividades
‘Conecta con Galicia’ desenvolvese en dúas modalidades. A primeira delas son actividades de aire libre, modalidade da que se beneficiarán 174 mozos e mozas galegos residentes fóra de Galicia, distribuídos en dous grupos de idade, de 14 a 17 anos e de 18 a 20 anos. Estes beneficiarios e beneficiarias do programa compartirán con mozos e mozas residentes en Galicia, en dúas quendas de doce días no mes de xullo, as residencias e albergues xuvenís situados en Galicia e dependentes da Dirección Xeral de Xuventude, Participación e Voluntariado.

Nestas instalacións  realizarán dúas actividades, de seis días cada unha. Durante a primeira, denominada “Cultura e Camiño”, as e os participantes aloxaranse nas devanditas residencias, onde participarán en actividades dirixidas a coñecer o patrimonio histórico cultural das respectivas zonas, e percorrerán o Camiño de Santiago en varias etapas ata o destino final en Compostela. O segundo grupo de actividades, tamén de seis días de duración, desenvólvese baixo o paraugas do epígrafe “O mar de Galicia” no albergue xuvenil de Gandarío en Bergondo (A Coruña) onde realizarán actividades de náutica de lecer e de coñecemento do medio mariño.

Campos de traballo
A segunda modalidade son os campos de traballo, para os que se teñen convocado 22 prazas, para participantes con idade comprendidas entre os 20 e 30 anos. Trátase de actividades de colaboración desinteresada e voluntaria en traballos diversos na procura dun maior coñecemento da cultura galega, da mellora ambiental da contorna, e da recuperación do patrimonio cultural e arquitectónico.

Con carácter previo á realización da viaxe a Galicia, os mozos e mozas seleccionados, tanto nunha modalidade como na outra, asistirán ás sesións informativas que se realicen nos seus países de orixe, especificamente encamiñadas ao coñecemento da realidade galega en xeral e das actividades a desenvolver no programa en particular. Tamén serán informadas e informados das súas obrigas respecto do cumprimento do réxime interno das residencias ou albergues en que se aloxarán.

A resolución do DOG explica os requisitos que as e os candidatos deben reunir para poderen optar ao programa, e os lugares onde se pode presentar a documentación requirida. Tamén establece un prazo de un mes para a presentación das solicitudes, polo que remata o 2 de maio.

Por países
Neste ano resérvanse 72 prazas para solicitudes que proveñan da Arxentina (67 para actividades ao aire libre, e 5 para campos de traballo), 40 para Uruguai (36 e 4), 22 para Venezuela (20 e 2), 15 para Brasil (12 e 3), e 9 para Cuba (7 e 2). Para as que proveñan doutros países de América resérvanse 14 (12 e 2), para os países de Europa 8 (6 e 2), e para as que proveñan doutras Comunidades Autónomas españolas, outras 16 (14 e 2).

1276 lecturas