«O Arame» ('The Tightrope'), ópera galega, en Londres
O luns 26 de xuño ás 13:30 h, en The Tabernacle (en Notting Hill), representarase O Arame ('The Tightrope'), ópera en galego -con subtítulos en inglés- con libreto de Manuel Lourenzo e música de Juan Durán.
Entradas (£5.90): eventbrite.co.uk
Máis info: xoga.co.uk
Trátase dunha adaptación dunha obra de Lourenzo publicada en Camiñar polo arame cunha lata de cervexa (Laiovento, 2005) que conta a historia de dous cómicos que, xa vellos, regresan ao seu lugar de orixe, Fisterra, e cuestionan as súas traxectorias vitais.
Baixo a dirección musical de Tamara Lorenzo, impulsora de XOGA, e coa soprano Lorena Paz enriba das táboas, esta ópera de cámara nun só acto e de 75 minutos de duración busca combinar a lingua galega coa música e o movemento, con quince músicos e un elenco de dous cantantes e dous bailaríns sobre o escenario.